الخميس، 16 أغسطس، 2007

كل حاجة

كل حاجة فيا فاكرة حاجة فيك
لسة صوتى جوه منى بيناديك
حتى عينى لسة فاكرة لون عنيك
لسة باحلم إنى أرجع يوم إليك

لسة فاكر يوم وداعنا ويوم لقانا
لسة عايش ع الأمل يعود هوانا
الهوى اللى عاش بيجرى بين دمانا
والى عاش مشتاق للمسة من إيديك
كل حاجة فيا فاكرة حاجة فيك

كل حاجة فيا لسة عايشة ع الحنين
رافضة بعدك مهما طال بعدك سنين
عاشقة صوتك حتى لو صوتك أنين
بس قلبى لسة برضو مش لاقيك
كل حاجة فيا فاكرة حاجة فيك

كل ساعة فرح عاشت بين ضلوعنا
كل لحظة حزن جرت يوم دموعنا
كل ده مستنى منك يوم رجوعنا
إمتى ترجع إمتى قلبى يلتقيك
كل حاجة فيا فاكرة حاجة فيك

هناك 3 تعليقات:

marwa يقول...
أزال المؤلف هذا التعليق.
رؤية يقول...

كلماتها جميلة

غير معرف يقول...

ما أجملها وما أرقها أن بها من المشاعر الصادقة ما نفذ إلى قلبى ليجعلنى أشعرمعك تلك الحالة العاطفية